АУДАН ЖАҢАЛЫҚТАРЫ

ХАЛЫҚАРАЛЫҚ ТАЛАПҚА САЙ

Ордабасы ауданында “Ордабасы нан” жауапкершілігі шектеулі серіктестігі заманауи үлгідегі Түрік технологияларын пайдаланып, сапалы ұн өнімін өндіруде. Өнім халықаралық деңгейдегі мемлекеттік талаптарға , ал өндіріс қондырғылары халықаралық стандартқа сәйкестендірілген. Алғаш рет жұмысын 2008 жылдың ІІ тоқсанында бастаған серіктестік 2015 жылы өндіріс қуаттылығын арттыру мақсатымен дирімен құрылысын ұлғайтып, Түрік технологиясымен жаңа қондырғылар орнатты. Осылайша тәулігіне 250 тонна өнім өндіретін диірменді іске қосты. Бұл жобаның инвестициялық құны 470 млн теңгені құрады, өз қаржысы 280,0 млн.т. «Бизнестің жол картасы-2020» мемлекеттік бағдарламасының «Өндіріс-2» желісі бойынша 6 пайызбен 7 жыл мерзімге «Даму» кәсіпкерлікті қолдау қоры» арқылы несиелендірілді.
Бүгінгі таңда “Ордабасы нан” өнімдері отандық нарықпен қатар, Ауғанстан, Қырғызстан, Өзбекстан елдеріне экспортталуда. Серіктестік директоры Бауыржан Сапарымбетовтың мәлімдеуінше, бүгінде диірменде 50-ге жуық азамат жұмыспен қамтылған.

23.10.2017

КӘСІПКЕРЛЕР ПАЛАТАСЫ ЕСЕП БЕРДІ

Бүгін ОҚО Кәсіпкерлер палатасының Ордабасы аудандық филиалы кеңейтілген мәжіліс өткізіп, 2017 жылдың 9 айында атқарылған жұмыстары жөнінде есеп берді. Филиал директоры Нұрғали Ақмұратовтың мәлімдеуінше, жыл басынан бері «Атамекен» ҰКП-ның Ордабасы аудандық филиалына кәсіпкерлердің құқығын қорғау мақсатында 69 өтінім арыз түскен, оның 40 өтініші – бизнес-жобаларға қаржы қарастыруға қатысты. Бизнес-жобаларды қаржылай қолдау мақсатында «Ауылшаруашылығын қаржылай қолдау қоры» АҚ арқылы 7 жоба 35 млн 700 мың теңгеге , «Ырыс» МҚҰ арқылы 29 жоба жалпы сомасы 100 млн 400 теңгеге, «Агро несие серіктестігі» АҚ арқылы 1 жоба 9,0 млн. тг., «Максимум» АИО» ЖШС арқылы 2 жоба 69,0 млн.тг., Екінші деңгейлі банк «АТФ» АҚ арқылы 1 жоба 35,0 млн теңгеге қаржыландыруға дейін сүйемелденіп, көмек көрсетілді. Жаңадан іске қосылып отырған “Бастау бизнес” жобасы бойынша ауданда 151 жұмыссыздар мен өзін-өзі жұмыспен қамтығандар кәсіпкерлік негіздеріне оқытылған, сертификат иеленген. «Бизнестің жол картасы 2020» бағдарламасы аясында іске асып отырған «Бизнес Кеңесші» жобасы бойынша 87 кәсіпкерлер мен кәсіпкерлік бастамашылығы бар тұрғындар үшін қысқа мерзімді оқыту курсы өткізіліп, сертификаттар табысталды.
Жиын барысында ОҚО Кәсіпкерлер палатасы директорының орынбасары Қайрат Әкенов, Ордабасы ауданы әкімінің орынбасары Бауыржан Омарбеков, «Ырыс» МҚҰ» ЖШС және «Ауыл шаруашылығын қаржылай қолдау қоры» АҚ ОҚФ-ның Ордабасы ауданындағы өкілдері кәсіпкерлер тарапынан қойылған сұрақтарға жауап беріп, саланы дамыту бойынша ұсыныстарды талқылады. Сонымен қатар, кәсіпкерлікті жетілдіру тетігінің негізі ынтымақтаса жұмыс жасауда екенін тілге тиек етіп, жоспарларын ортаға салды.
Бүгінгі таңда Ордабасы ауданы бойынша тіркелген шағын және орта кәсіпкерліктегі кәсіпорындардың саны – 9 869 нысан. Оның ішіндегі жұмыс істеп тұрған шағын және орта кәсіпкерліктегі кәсіпорындардың саны 9 172, бұл жалпы тіркелген кәсіпорынның 92,9 пайызын құрайды. Осы құрылымдар бойынша жұмыспен қамтылған – 20 918 адам.

20.10.2017

ДІН МЕН ДӘСТҮР ҮНДЕСТІГІ ҮЙЛЕСІП

18-қазан – Рухани келісім күніне орай бүгін Ордабасы ауданы әкімдігінде ауыл имамдарының қатысуымен дөңгелек үстел өтті.
Рухани келісім – мемлекет дамуының маңызды факторларының бірі. Қазақстан Республикасының Президенті Нұрсұлтан Әбішұлы Назарбаевтың «Болашаққа бағдар; рухани жаңғыру» стратегиялық мақаласында ұлттық кодтың маңызы, рухани жаңғырудың болашақ үшін әсері кеңінен баяндалғаны баршаға аян. Ал, биылғы дәстүрлі «Қазақстанның үшінші жаңғыруы: жаһандық бәсекеге қабілеттілік» Жолдауында еліміздің Қауіпсіздік ахуалы қуатты және әрекет ете алатын мемлекеттің өлшеміне айналып келетінін айтты. Діни экстремизмді насихаттаудың алдын алу, әсіресе интернет пен әлеуметтік желіде оның жолын кесу жұмысын жүргізуді жүктеді. Қоғамда, әсіресе, діни қарым-қатынас саласындағы радикалды көзқарасқа байланысты кез келген әрекетке «мүлде төзбеушілікті» қалыптастыруды тапсырды. Аудан әкімі Рашид Қайыпжанов
еліміздің Конституциясында Қазақстан Республикасы дін мемлекеттен бөлінген зайырлы мемлекет екендігі нақты айқындалғанын, дегенмен, мемлекет дамуында ұлтаралық татулық пен дінаралық келісімнің ерекше маңызы барын атап өтті.
Аудандық мәслихаттың хатшысы Баймахан Сәдуахасов рухани келісім күнінің шығу тарихына тоқталып, оның мәнін аша түсті. Ауыл имамдары көкейіндегі мәселелерді ортаға салып, пікір алмасты. Дін мен дәстүр үндестігін сақтап, ел игілігі үшін аянбайтындарын жеткізді. Жиын соңында Рашид Үсіпханұлы дін қызметкерлеріне Алғыс хат тапсырды.

19.10.2017

Ордабасы ауданының тұрғындарына, кәсіпкерлік субъектілеріне және уәкілетті мемлекеттік орган басшыларына

ҮНДЕУ
Заңдылықты қамтамасыз ету, құқық бұзушылықтардың алдын алу, сондай-ақ қоғамдық қауіпсіздікті қамтамасыз ету, адам мен азаматтың құқықтары мен бостандықтарын қорғау мақсатында (Қазақстан Республикасының «Прокуратура туралы» Заңының 31 бабына сәйкес)
Кәсіпкерлік – азаматтардың, оралмандардың және заңды тұлғалардың мүлікті пайдалану, тауарларды өндіру, сату, жұмыстарды орындау, қызметтер көрсету арқылы таза кіріс алуға бағытталған, жеке меншік құқығына (жеке кәсіпкерлікке) не шаруашылық жүргізу немесе мемлекеттік кәсіпорынды жедел басқару құқығына (мемлекеттік кәсіпкерлікке) негізделген дербес, бастамашыл қызмет. Кәсіпкерлік субъектілері – Қазақстан Республикасының заңнамасын, жеке және заңды тұлғалардың құқықтары мен заңды мүдделерін сақтауға міндетті. Дегенмен, кейбір кәсіпкерлік субъектілерімен, Қазақстан Республикасының лицензиялау саласындағы және алкоголь өнімін өткізу жөніндегі талаптарын сақталмайтындығы жасырын емес. Мысалы, Шұбарсу ауыл округінде белсенді кәсіпкерлікпен айналысатын 200-ге жуық кәсіпкерлік субъектісінің 60 астамы, алкоголь өнімін сақтауға және бөлшек саудада сатуға арналған лицензиясыз қызметін атқарып келеді. Ағымдағы жылдың өткен мерзімінде, аудандық ішкі істер бөлімімен жүргізілген рейдтік іс-шаралар барысында, кәмелет жасына толмаған жасөспірімдерге алкоголь өнімін және темекі бұйымдарын өткізу барысында 4 кәсіпкерлік субъектісі анықталып, оларға қатысты әкімшілік хаттама толтырылған. Мағыналас, облысымыздың басқа аудандарында кәмелет жасына толмаған жасөспірімге алкоголь өнімдерін өткізген және түнгі мезгілде алкоголь өнімін сатқан кәсіпкерлік субъектілері де әкімшілік жауапкершілікке тартылуда.
Қазақстан Республикасының Рұқсаттар және хабарламалар туралы Заңы талаптарына сай, алкоголь, темекі өнімдерін сақтау және бөлшек саудада сату белгілі уәкілетті орган беретін рұқсат (лицензия) арқылы жүзеге асырылады.
Бұл талаптарды сақтамаған кәсіпкерлік субъектілеріне, Қазақстан Республикасының Әкімшілік құқық бұзушылық туралы кодексінің 463-бабына сәйкес, әкімшілік құқық бұзушылық жасау салдарынан алынған кірісті (дивидендтердi), ақшаны, бағалы қағаздарды қосымша тәркілей отырып, әкімшілік айыппұл салынады. Сол сияқты, жиырма бір жасқа дейінгі адамдарға алкоголь өнімін өткізу, мейрамханаларда, барларда және дәмханаларда өткiзудi қоспағанда, алкоголь өнімін өткізу, тиісті қызмет түріне лицензиядан айыра отырып әкімшілік айыппұл салуға алып соғады. Қазақстан Республикасы заңнамасының темекi бұйымдарын сату жөнiндегi талаптарын бұзуға, әкімшілік жауапкершілік көзделген.
Осыған орай, құрметті аудан тұрғындары және кәсіпкерлік субъектілеріне! Сіздерді аталған талаптар мен шектеулерді сақтай отырып, құқық бұзушылыққа жол бермеуге шақырамын.
Уәкілетті мемлекеттік орган басшыларына кәсіпкерлік субъектілері арасында осы бағытта қолданыстағы заңнама талаптарын түсіндіруді ұсынамын.
Бұл үндеуді, құқық бұзушылықтың алдын алу, сондай-ақ қоғамдық қауіпсіздікті қамтамасыз ету және адам мен азаматтың құқықтары мен бостандықтарын қорғау мақсатында жариялаймын.

Ордабасы ауданының прокуроры әділет кеңесшісі Б.Булеулиев

18.10.2017

“ҰРПАҚ АЛДЫНДА ҰЯТҚА ҚАЛЫП ЖҮРМЕҢІЗДЕР…”

Бүгін Бадам ауылыныда аудан әкімінің кезекті көшпелі актив мәжілісі өтті. Күн тәртібіне сәйкес, бірінші болып ауыл округінің әкімі Махмут Қонысов сөз алып, атқарылған жұмыс барысын баяндады. Бадам ауыл округінің жалпы жер көлемі – 44779 га. тұрғындар саны – 15 740. Ауыл округі бойынша өндірістік кооперативтер – 5, ауыл шаруашылығымен айналысатын жауапкершілігі шектеулі серіктестіктер – 20, шаруа қожалықтар-81. «Нәтижелі жұмыспен қамтуды және жаппай кәсіпкерлікті дамыту бағдарламасына» 2017 жылдың 9 айында 323 адам қатыстырылды. Бадам ауыл округі бойынша 18 жасқа дейінгі жәрдемақымен қамтамасыз етілетін отбасы – 408, 1 отбасыға атаулы әлеуметтік көмек көрсетіледі. 129 отбасына «Өрлеу» жобасы бойынша ақшалай көмек көрсетілген. Ауыл округінің қылмыстық ахуалын жергілікті полиция қызметінің учаскелік инспекторы Ғани Есенгелдиев әңгімеледі. Жыл басынан тіркелген қылмыстар – 49, оның 34-і ашылған. 58 азаматқа әкімшілік құқық бұзу жөнінде хаттама толтырылып, 257 534 теңге айыппұл салынған.
Аудандық кәсіпкерлік бөлімінің басшысы Фатима Тәшімова, аудандық сәулет және қала құрылысы бөлімінің басшысы Олжас Көпжасаров, аудандық жер қатынастары бөлімінің басшысы Мейрамбек Ақмұратов, аудандық тұрғын үй – коммуналдық шаруашылығы, жолаушылар көлігі және автомобиль жолдары бөлімінің басшысы Қуаныш Ысқақов салалары бойынша талдау жасап, ауыл округіндегі кенжелеген тірліктерге тоқталды.
Аудан әкімі Рашид Қайыпжанов:
– Ауылдың әлеуеті өте жоғары. Оның мүмкіндігін толық пайдаланып, сол арқылы әлеуметтік-экономикалық дамуына жағдай жасау – міне, сіздердің міндеттеріңіз осы. Жұмысты ұйымдастыра алмай, ұрпақ алдында ұятқа қалып жүрмеңіздер, – дей келе, ауыл округі әкіміне бірқатар тапсырмалар жүктеді.

 

18.10.2017

ЖІГІТТІҢ СҰЛТАНДАРЫ СЫНҒА ТҮСТІ

Қазақстан Республикасының Президенті   Н.Ә.Назарбаевтың «Болашаққа бағдар: рухани жаңғыру»  бағдарламасының   «Туған жер» жобасын іске асыру  мақсатында аудандық «Жастар ресурстық орталығының»  ұйымдастыруымен аудандық «Жігіттің  сұлтаны» сайысы өтті. Жүзден жүйрік таңдаған аталмыш шара Қараспан ауыл округі, Есенберлин атындағы жалпы орта метебінде ұйымдастырылды. Үміткерлер «Мен қазақтың ұлымын!», «Мақал – сөздің мәйегі», «Жігітке жеті өнерде аз», «Нысана көздеу» бөлімдері бойынша бақ сынасты.
9 үміткер қатысқан сайыста Шұбарсу  ауыл  округінен  Серікбаев Ғарифулла ерекшеленіп,  І орын иеленді. Қажымұқан ауыл округінен Төреш Сұлтанмахмұт – ІІ орын,  Шұбар ауыл округінен  Даумеков Құдияр ІІІ орын тұғырынан көрінді. Жеңімпаздар аудандық  «Жастар ресурстық орталығының»  алғыс  хаты және бағалы сыйлықтармен марапатталды.

16.10.2017

ӨТІНІШ-ТІЛЕКТЕРІМЕН АУДАН ӘКІМІНЕ ЖҮГІНДІ

Алдын ала бекітілген кестеге сәйкес, бүгін аудан әкімі Рашид Қайыпжанов тұрғындарды жеке мәселелерімен қабылдады. Қараспан ауылының биі Байдабек Ибашев ауылдастарының атынан бірқатар мәселені көтеріп, аудан басшысынан олардың оң шешілуіне ықпал етуді өтінді. Атап айтсақ, 4800 гектарға жуық егістікті суғаратын “Қазына” арнасының жан-жағын бетондау, Қараспан ауыл округінің 7 ауылын құбырлы таза ауыз сумен қамтамасыз ету ісі тез арада жүзеге асса деген тілегін жеткізді. Ал, Темірлан ауылындағы көппәтерлі үйдің тұрғыны Жайна Әбуова көрші баспанадағы жөндеу жұмыстарының өз пәтеріне зиянын тигізгенін, сондай-ақ ол құрылыстың заңдылығын тексеру бойынша арызданды.
Медициналық колледж түлегі Фариза Таңатар мамандығы бойынша жұмысқа орналасқысы келетінін айтып, аудан әкімінен көмек сұрады. Зейнеткер Мүтәлі Оразбайұлы аудан орталығынан жеке меншік балабақша ашуға ниетті екенін білдірді.
Рашид Үсіпханұлы көтерілген мәселелер мен өтініш-тілектерді жан-жақты зерделей келе, тұрғындарға тиянақты жауап берді. Кей мәселелердің уақытты талап ететінін, әйтсе де Заң аясында тиісті жұмыстар атқарылатынын тілге тиек етті. Тиісті сала басшыларына тапсырмалар жүктеп, орындалуы бойынша кешіктірмей нақты есеп беруді ескертті.

16.10.2017

БӨЛІМДЕ – ЖАҢА БАСШЫ

Ордабасы ауданы әкімінің 2017 жылғы 6-қазан күнгі №120-ж өкімімен бүгін ЫСҚАҚОВ Қуаныш Ғалымжанұлы аудандық тұрғын үй коммуналдық шаруашылығы, жолаушылар көлігі және автомобиль жолдары бөлімі басшысының міндетін атқаруға кірісті.

10.10.2017

ТҰРҒЫНДАРДЫҢ ТАЛАП-ТІЛЕГІН ТЫҢДАДЫ

Алдын ала бекітілген кестеге сәйкес, бүгін аудан әкімі Рашид Қайыпжанов тұрғындарды жеке мәселелерімен қабылдады.
Көпбалалы ана Қадиша Ахметова өзіне Қараспан ауылынан берілген коммуналды баспананың жарығы мен жылуына қатысты мәселесін жеткізді. Қараспан ауыл округінің әкімі Қуаныш Зиябек баспананың қолды болған электр есептегішіне қатысты учаскелік полицияға өтініш түсіргенін, ал жылу жүйесін барып көріп, ақау анықталған жағдайда тез арада ретке келтірілетінін мәлімдеді. Көктөбе ауылынан келген қария Жоламан Ахметұлы Нұралы Нысанбайұлы атындағы жалпы орта мектептің қоршауын жаңарту мен ауыл көшелерін жарықтандыру қажеттігін айта келді. Бұл мәселеге қатысты аудандық тұрғын үй – коммуналдық шаруашылығы, жолаушылар көлігі және автомобиль жолдары бөлімі басшысының орынбасары Ғалымжан Оспанқұл сөз алып, Көктөбе ауылының орталық көшесіне электр жарығы биыл жүргізілетінін тілге тиек етті. Шұбарсу ауылынан “Прометей Восход” тұтыну кооперативінің төрайымы Валентина Качкаева тұрғындарды электр қуатымен қамтамасыз етуге иелігіндегі трансформатордың қуаты жетпейтінін алға тартып, аудан басшысынан жаңа трансформатор алуға көмек беруін сұранды. Темірландық кәсіпкер Жақыпбек Құрманбеков шұжық цехының құрылысын жүргізуге аудан орталығы аумағынан жер бөлінсе деген тілегін жеткізді.
Рашид Үсіпханұлы әр мәселені зерделей келе, орынбасарлары мен тиісті сала басшыларына тапсырмалар жүктеді.

10.10.2017

АРДАГЕРЛЕР АЛҒЫС АЙТТЫ

Бүгін Ордабасы ауданының әкімі Рашид Қайыпжанов аудандық ардагерлер кеңесінің мүшелерімен кездесті. Халықаралық қарттар күні мерекесі аясында ұйымдастырылған бұл шарада ардагерлер ауданда орын алған оң өзгерістерге тоқталып, аудан басшысымен еркін пікір алмасты.
Қажымұқан ауыл округінен Тілектес Айтбаев, Лесбек Жүсіп ауданды газдандыруға қатысты сұрақ қойса, төрткүлдік Жүнісбай Шалтайұлы жастарды ауылшаруашылықты дамытуға жұмылдыру жайын қозғады. Шұбарлық ардагер БатырханТұяқбаев ауылдастарының бастауыш мектеп ғимараты жаңартылса деген сәлемін жеткізді. Еңбек ардагері Қойшыбай Әріпбаев, аудандық ардагерлер кеңесінің төрағасы Тұран Әбдіқайымұлы қарияларға көрсетілген құрмет үшін аудан әкіміне алғыс айтты.
Рашид Үсіпханұлы ұсыныс-тілектердің барлығына жеке тоқталып, атқарылатын тірліктер жайын баяндап өтті.
– Сіздер – еңбек майданында шыңдалып, жұдырықтай жұмылып, елімізді енді егемендігін алған шақта қиын-қыстау кезеңнен алып шықтыңыздар. Тәжірибелеріңіз біз үшін өте маңызды. Әлі де ел тыныштығын сақтап, ауылдарыңыздың қисығын түзетіп, тентектерін жөнге салып келесіздер. Ордабасы өңірінің жақсы атын шығарып, оны өркендету жолында Сіздердің алатын орындарыңыз ерекше, – деді аудан басшысы өз сөзінде.
Жиын соңында Ұлы Отан соғысының ардагері Қалмен Мұратов көпшілікке ізгі ниетін жеткізіп, батасын берді.

06.10.2017